धुळे जिल्ह्यात शिरपूर तालुक्यातील वाठोडे शिवारात घडली घटना
धुळे जिल्ह्यातील शिरपूर तालुक्यात एक अत्यंत हृदयद्रावक आणि संतापजनक घटना समोर आली आहे. वाठोडे गावाच्या ताजपुरी शिवारामध्ये किरकोळ कारणावरून 67 वर्षीय आईची तिच्याच मुलाकडून लाकडी दांडक्याने अमानुष हत्या करण्यात आली.
मृत महिलेचे नाव टिपाबाई रेबला पावरा असून त्या मूळच्या खैरकुटी (ता. शिरपूर, जि. धुळे) येथील रहिवासी होत्या. त्या आपल्या शेतात असताना, त्यांचा मुलगा आवलेस रेबला पावरा (वय 25 वर्षे) याने तिला मारहाण करत गंभीर दुखापत केली. हल्ला इतका गंभीर होता की टिपाबाई यांचा घटनास्थळीच मृत्यू झाला.
घटनेमागील कारण: मासे कुत्र्याने खाल्ले म्हणून राग
प्राथमिक माहितीनुसार, वृद्ध महिलेने जेवणासाठी मासे बनवले होते. मात्र, सदर मासे कुत्र्याने खाल्ल्याचे लक्षात आल्यानंतर आरोपी मुलगा संतप्त झाला आणि त्याने आईला शिवीगाळ करत लाकडी दांडक्याने मारहाण केली. या मारहाणीमुळे त्यांच्या डोक्याला गंभीर इजा झाली आणि त्यातच त्यांचा मृत्यू झाला.
पोलीसांची तत्काळ कारवाई
घटनेची माहिती मिळताच थाळनेर पोलीस स्टेशनचे कर्मचारी तातडीने घटनास्थळी पोहोचले. त्यांनी मृतदेह ताब्यात घेतला असून शवविच्छेदनासाठी पाठवण्यात आला आहे. आरोपी आवलेस रेबला पावरा यास अटक करण्यात आली आहे. गुन्हा नोंदवून पुढील तपास सुरू आहे.
स्थानिकांमध्ये संताप आणि हळहळ
या घटनेनंतर परिसरात खळबळ उडाली असून नागरिकांमध्ये संतापाचे वातावरण आहे. मामुल्या कारणावरून आईसारख्या व्यक्तीचा जीव घेणाऱ्या मुलाच्या कृत्यावर सर्वत्र टीका होत आहे.
