राज्य सरकार ‘मुलगी वाचवा, मुलगी शिकवा’ हे ब्रीदवाक्य घेऊन काम करत असतानाही मुलींच्या जन्माला असणारा विरोध अद्यापही संपलेला नाही, याची धक्कादायक प्रचिती पुन्हा एकदा पालघर जिल्ह्यात आली आहे. डहाणू शहरातील लोणीपाडा भागात चौथे अपत्यही मुलगी झाल्याच्या नैराश्यात एका आईने आपल्या नवजात चिमुरडीचा गुदमरवून खून केल्याची खळबळजनक घटना उघडकीस आली आहे. ही घटना शनिवारी (२६ एप्रिल) मध्यरात्री डहाणू उपजिल्हा रुग्णालयात घडली.
डहाणू पोलिस ठाण्यात या प्रकरणी गुन्हा दाखल करण्यात आला असून, आरोपी पूनम शहा हिला पोलिसांनी अटक केली आहे. पोलिसांकडून मिळालेल्या माहितीनुसार, पूनम शहा ही मूळची उत्तर प्रदेशची असून तिचे सासर कोलकात्यात आहे. सध्या ती लोणीपाडा येथे राहणाऱ्या आपल्या आई-वडिलांकडे काही काळासाठी आली होती.
काही दिवसांपूर्वी तिने घरच्याच घरी प्रसूती केल्यानंतर तब्येत खालवल्याने तिला डहाणू उपजिल्हा रुग्णालयात दाखल करण्यात आले होते. चौथे अपत्यही मुलगी झाल्याचे समजताच ती तीव्र नैराश्यात गेली होती. या नैराश्यातूनच शनिवारी मध्यरात्री तिने आपल्या नवजात चिमुरडीचे नाकतोंड दाबून तिचा गुदमरून खून केला.
घटनेची माहिती मिळताच रुग्णालय प्रशासनाने तत्काळ पोलिसांना कळवले. पोलिसांनी घटनास्थळी धाव घेत नवजात बालिकेचा मृतदेह शवविच्छेदनासाठी पाठवला असून, पूनम शहा हिला ताब्यात घेतले आहे. प्राथमिक चौकशीत तिने गुन्ह्याची कबुली दिल्याचे पोलिसांनी सांगितले.
या संपूर्ण प्रकरणाचा तपास उपविभागीय पोलिस अधिकारी भागीरथी पवार यांच्या मार्गदर्शनाखाली सुरू आहे. या अमानुष घटनेमुळे परिसरात हळहळ व्यक्त केली जात असून, समाजमन सुन्न झाले आहे.
